ಸುಟ್ಕೆಚೆ ವಾಟೆರ್...

ಸುಟ್ಕೆಚ್ಯಾ ಪಾವ್ಲಾಂನಿ ಝರ್  ಪುಟೊನ್
ನ್ಹಂಯ್ ವ್ಹಾಳೋನ್, ಕಾಟಾಂಚ್ಯಾ ಬಾಂದಂಕ್ ಫೋಡುನ
ವಾಟೆರ್ ಸಬಾರ್ ನ್ಹಂಯ್ಚ್ಯೊ ಸಂಗಮ್,
ದರ್ಯಾಚೆ ವೆಂಗೆಂತ ಘುಸೋನ್.
ಏಕಾ ಸಾಗೊರಾಂತ್ ಸಬಾರ್ ನ್ಹಾಂಯೊ!
ಅಗಣಿತ್ ನ್ಹಂಯಾಂ ಥಾವ್ನ್ ಏಕ್ ಸಾಗೊರ್!
ಏಕಾಭಿತರ್ ಏಕ್ ನಾಸ್ತಾಂ,
ಸುಟ್ಕೆಚಿ ಪರಮ್ ಘಡಿ.

ಸುಟ್ಕೆಚ್ಯಾ ಮೆಟಾಂನಿಂ ಪ್ಹುಲಾಂಚೋ ಪರ್ಮಳ,
ಪಾಳಾಂನಿಂ ಫುಲಾಚೋ ಸ್ವಾದ್ ನಿರ್ದಾರ್ ಜಾವ್ನ್,.
ಏಕ್ ಮೂಟ್ ಮಾತಿಯೆಂತ್ ಲಿಪ್ಲ್ಯಾಂತ್ ಸಬಾರ್ ಸ್ವಾದ್ !
ಏಕಚ್ಚ ಮೂಟ್ ಮಾತಿಯೆಂತ್ ವಿಬಿನ್ ರೂಚ್!
ಫುಲ್ ಆನಿ ಪರ್ಮಳಾಚಿಂ ನಾಂವಾಂ ಮಿಸ್ಳಾತಾನಾ!
ಸುಟ್ಕೆಚಿ ಪರಮ್ ಘಡಿ !!!

ಸುಟ್ಕೆಚೆ ಪೆಚಾಡ್ನೆಂತ್ ಬಿಂ ಏಕ್ ಕಿರ್ಲೊನ್,
ಸರ್ಲಾಂಚೆಂ ಬಂದನ್ ತುಟಾಂವ್ಕ ಸಕ್ತಾನಾ,
ನವ್ಯಾ ಜಿವಾಚೋ ಜಲ್ಮ್...
ಏಕಾ ಬಿಯಾಂತ್ ಸಬಾರ್ ರುಕಾಂ!
ಎಕಾ ರುಕಾಂತ್ ಅಗಣಿತ್ ಬಿಯಾಂ!
ಬಿಂ ರೂಕ್ ಜಾವ್ನ್ ವಾಡ್ತಾನಾ,
ಸುಟ್ಕೆಚೋ ಭ್ಹರ್ವಸೊ!!!

ರಚ್ನೆಚಿಂ ಪಾವ್ಲಾಂ ಸುಟ್ಕೆಚೆ ವಾಟೆರ್,
ಸುಟ್ಕೆಚ್ಯಾ ಝುಜಾಕ್ ಅರ್ಥ್   ಸಬಾರ್ !!!

ವಿನ್ಕೋ